المنوعات

من روائع الراحل محمد طه القدال.. إذا ما البيت لبخ جالوص

……
إذا ما البيت لبَخ جالوص
مزبَّل للخريف عِمة
وكان جواهو محبوبين
وهبَّابين
وخمسة عيال وسحَّارة
كان في الحوش
عَقَاب معزاية للشفع
كان الدنيا يا الضلمه
وكان القـِبله جهَّاره
وكان الغيمه هدَّاره.
مَرَق حمدان يسيلو تـَرَس
علي مونة السنة المشلوخ
إذا ليهو الترس ينفع
ماهمَُو السما الدَّمَّع
رجع والدنيا دوَّاره
ويا الحوش الصِبِـح ميضه
وبِدور مركب:
دحين يبقى السَرِف نعمة؟
دحين يبقى البلد خرَّف؟
أمُرْقي العدة يا ام احمد..
بدور أضهب
بكِسْر الحوش عشان الساس
واسيلي على الحَدَب مصرف.
وقام أحمد يحاوط البيت
اسرِع يابا
جانا غضب
شقوق ام سيسي والفارة
وكان الدنيا يا الضلمة
وكان القـِبلة جهارة
وكان الغيمه درّارة.

سبلوقاتنا ما صبّن
سباليق جارنا سوّن جَو
ودميع السحابن نوّح
ويا معز اللبن دغّن
ويا البقر الطلق بوّح
جفل في الزيفة ديك روّح
ويا الكلَّاب يسوّن هَو
وقام حتى الجداد كيّك
ويا مرق السنط سيّك
وتسمع بُرْدُلُوب حيطة
ويا ابو مروَّه.. يا ابو مروَّه.. يا ابو مروَّه
بيت حاجة أم خريف دَرْكان
تجيك من الفريق عيطة
وتقرا أم احمد البسم الله
تقرا أم احمد البسم الله
أقيدي اللمبة يا ام احمد
وحفضي مع الهدوم شيطة
تعال آزول
تعال الحق صعيد البيت خلاص إمّاص
أمرقي الشفع اليتلافو سَدر الحوش
بشوف الجاية في الرصاص
قُتلِك أمُرْقي آآ بنيَّة
وطينتاً في التراب نيَّة
قُتلِك أمرقي
فرشاً يطير
هو شِن هبَّاب
وشِن كرَّاب
وشِن قُرقاب
وتسمع بردولب
يا المعزة وقعت ناشفة
بين الشِعبتين والباب
وكان اب احمد المهجوم بيقرا الفاتحة في سرُّو
بيقول:
الجات علي مالك
مليحاً جات علي متالك
تعال آجني وكنكش فوق كتف خيّك
عاد لا حوله لا قوة
جانا غضب
ومويه ركب
وداك الحَزّه كان الحله شِرْقَت تـَبْ
وكان اتشتت الرصاص
وكان الساس
حـَتـَل وإمَّاص
حتل وإماص
حتل وإماص.

دمِّيع السما
ودمع الجُهال واحد..
دمع الجهال في الضـَلـْمة
كان مالح
وكان القبلة في عينينا دوارة
كان الدنيا يا الضلمة
وكان القبلة جهّارة
وكان الغيمه هدّارة
ودرّارة
وأصبح بيتنا لي تولاتنا كفَّاره.

وشـِن بتقولي في القبلي المدمع فوق عشم عشمان؟
خلاف دمع العشم مو نوح
دمع العشم مو نوح
وشن بتقولي في الصباحي؟
والضحوية؟
والضهراوي والطوفان؟
وشن بتقولي في الجيعان؟
وفي العريان؟
وشن بتقولي في الصرمان؟
وفي الخاتي الدرب ضهبان؟
وسدرِك امان
وحِجـْرِك لي جناكي ضمان
باقية علي المدائن في المحل
مونة وقدح ضيفان
وباقية علي الجناين
دوح
ولو غيّرك بجابد في العنا الطوفان
ولا غيرك سفينة نوح
ولا خابت عليك مسرتنا
نتراجك
على ميعادنا نترجاك
بالسلوكة نترجاكي
بالدلوكة نترجاكي
بالدوباي
وبالدوباي تقوم يا بيتنا
بيت الطين
حِملة يوم
شراية يوم
لتيبة يوم
ولبنايتاً تخدر
في مسورنا الجاي
رحم الله محمد طه القدال
صوت ابناء المزراعين

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
%d مدونون معجبون بهذه: